Ab tum bahut yaad aate ho

Kabhi kabhi yun hi jab mere khwab
Haqikat se kuch aage bhaagte hain,
Jab raat ke khamosh andhere me
Meri khwahishon ke ujale jaagte hain,

Jab subah ki thandi taazi hawaon me
Tumhari hansi khushboo nahi pata hun,
Tumhe sapno me mehsus to karta hun
Par tere honthon ko chhu nahi pata hun,

Jab tum ankahe hi chupke se aakar
Meri palkon me ek aansu ban jaate ho,
Sach hai zindagi ki in raahon me
Ab tum bahut yaad aate ho..

Jab radio pe bajte har gaane khud hi
Jaane kaise tumse jud jaate hain,
Meri baton ke har tanha raaste jab
Teri hi taraf me mud jate hain,

Jab kabhi mann me teri shararton
Se bhare palon ki mithas aati hai,
Tere saath hone ki is dil me jab
Anjaani si ek tez pyas aati hai,

Shayad tum nahi jaante ho par
Mere mann ko tum bahut satate ho,
Sach hai zindagi ki in raahon me
Ab tum bahut yaad aate ho..

Jab kabhi ek ehsaah aata hai k shayad
Tum b chhupke mujhe yaad karte ho,
Apni har sacchi duaon me shayad
Mujhe hi paane ki fariyad karte ho,

Dil ko jab kabhi lagta hai ke tum
Rahon me baithe mera intezaar karte ho,
Jab kabhi tum ye jata dete ho ke
Wo mai hun jis'se tum itna pyar karte ho,

Jab kabhi meri khushi ki wajah ban
Pal bhar me hi chale jaate ho,
Sach hai zindagi ki in raahon me
Ab tum bahut yaad aate ho..